ಪ್ರಶ್ನೆ ...

                           

                

ಈಗ ಚಿಮಿಣಿ ಎಣ್ಣೆ ಸಿಗುವುದಿಲ್ಲ.ಡೀಸೆಲ್ ದೀಪದ ಹೊಗೆಕಾರುವ ಬೆಳಕಿನಲ್ಲಿ ಬೀಡಿಕಟ್ಟಿ ಮಲಗುವಾಗ ನಡುರಾತ್ರೆ ಆಗ್ತದೆ.

  ಬೆಳಗ್ಗೆ ಮೂರೂವರೆಗೆ ಎದ್ದು ಪುನ: ಬೀಡಿಯ ಕೆಲಸ.ಏಳು - ಒಂಭತ್ತು ವರ್ಷದ ಇಬ್ಬರು ಗಂಡು ಮಕ್ಕಳಿಗೆ , ಗಂಡನಿಗೆ , ತನಗೆ ಬೆಳಗಿನ ತಿಂಡಿ ಮಾಡಿಕೊಳ್ಳಬೇಕು .

  ಮಧ್ಯಾಹ್ನ ಊಟಕ್ಕೆ ಗಂಜಿ - ಚಟ್ಣಿಯೋ ಪಲ್ಯವೋ ಸಿದ್ದ ಆಗಬೇಕು.

  ಬಾಕಿ ಮನೆಗೆಲಸ ,ಸೊಸೈಟಿ - ಅಂಗಡಿ ಜೊತೆಗೆ ಬೀಡಿ ಎಲೆ ಕತ್ತರಿಸಿಕೊಳ್ಳಬೇಕು. 

ಗಂಡ ಕೆಲಸಕ್ಕೆ ಹೋದರೆ ಹೋದ.ಏನಾದರೂ ತಂದರೆ ತಂದ.

 ಕುಡಿದು ಬಂದರೆ ಅವ ದುರ್ವಾಸ .

     ಇಬ್ಬರು ಮಕ್ಕಳೂ ಸುಮ್ಮಗಿರುವವರಲ್ಲ. ಮನೆಯ ಸುತ್ತ ಕಾಡಿನಲ್ಲಿ-

 ನೆಡುವುದು - ಕಡಿಯುವುದು - ಮೀಯುವುದು - ಜಾರುವುದು - ಏರುವುದು  ... ಅವರ ಮೇಲೆ ಸದಾ ತಾಯಿ ಕಣ್ಣು ಇರಲೇಬೇಕು.

  ಹೀಗೆ ಬದುಕಾಟ ಮಾಡುವ ಹೆಣ್ಣೊಬ್ಬಳು, ನಮ್ಮೂರಲ್ಲಿ ಇದ್ದಾಳೆ.ಬದುಕಿನ ಏಕತಾನತೆಯಿಂದ ಬೇಸತ್ತು, ನಮ್ಮಲ್ಲಿಗೆ ಒಮ್ಮೊಮ್ಮೆ ಬರುತ್ತಾಳೆ.

 ದನಗಳಿಗೆ ಹುಲ್ಲು ,ಚೂರುಪಾರು ಮನೆಗೆಲಸಗಳನ್ನು ಮಾಡಿ - ಮಾತಾಡಿ, ಹೊಟ್ಟೆತುಂಬ ಉಂಡು ಹೋಗುತ್ತಾಳೆ.

  ಮಕ್ಕಳೂ ಅಷ್ಟೇ - ಒಂದು ಪೇರಳೆ ಸಿಕ್ಕಿದರೆ ಮೂರು ತುಂಡು ಮಾಡುತ್ತವೆ.

 ಮೊನ್ನೆ - 

" ಮೊಬೈಲು ತೆಗೆಯಲು ಲೋನು ಸಿಗ್ತದಾ ಅಣ್ಣೇರೇ " ಅಂತ ನನ್ನಲ್ಲಿ ಕೇಳಿದಳು !

 ಓನ್ ಲೈನ್ ತರಗತಿಗಾಗಿ .ಕಂದಮ್ಮಗಳು ವಿದ್ಯಾವಂತರಾಗುವುದು ಅವಳ ಕನಸು .

  ಅಮೆಝಾನ್ ,ಪ್ಲಿಪ್ಕಾರ್ಟ್ , ಇ ಎಮ್ ಐ .. ಎಲ್ಲ ಉಂಟಲ್ಲ . ಆದರೆ ಅದು, ದುಡ್ಡಿದ್ದವರಿಗಾಗಿ ಮಾತ್ರ.

ಸ್ಮಾರ್ಟ್ ಫೋನಿಗೆ ಬೇಕು ಆರೇಳು ಸಾವಿರ.

     ನಾನೇನು ಅನುಕೂಲಸ್ಥನೇ! ಆದರೂ ,ಹಳತಾದರೂ ಒಂದು ಕೊಡಿಸಿದರೆ ?

  ಕರೆಂಟಿಲ್ಲದ ಮನೆ. 

ಮೊಬೈಲು ಚಾರ್ಜು ಮಾಡುವದು ಹೇಗೆ ?

ನೆಟ್ ಒಫರ್ ಹಾಕುವುದಕ್ಕೂ ಬೇಕಲ್ಲ ಒಂದು ಮೊತ್ತ ?

   ಊರಶಾಲೆಯ ಟೀಚರ್, ದಾರಿಯಲ್ಲಿ ಕಾಣಸಿಕ್ಕಿದರೂ ನೋಟ್ಸ್ ಕೊಡುವುದಿಲ್ಲ - ಸರಕಾರದ ಆದೇಶವೇ ಹಾಗಿದೆ . ಓನ್ ಲೈನ್ ತರಗತಿಯ ಓನ್ ಲೈನ್ ದಾಖಲಾತಿ ಬೇಕು .

        ಇನ್ನು ಹೇಗೆ ?

                                            -ಪನೆಯಾಲರವಿರಾಜ.